مرحبا بك في منتديات مجمع ثلوث المنظر


    ملف لكل ما يخص البشرة

    شاطر
    avatar
    صمتي حكاية
    مؤسسة المنتدى
    مؤسسة المنتدى

    عدد المساهمات : 66
    تاريخ التسجيل : 16/11/2009

    ملف لكل ما يخص البشرة

    مُساهمة من طرف صمتي حكاية في الجمعة ديسمبر 11, 2009 2:55 am

    أنواع البشرة



    فيه 5 أنواع رئيسية للبشرة العادية والدهنية والجافة والمختلطة والحساسة وكل نوع فيهم له مزايا وله عيوب ونبدأ بتعريف الأنواع المختلفة.


    البشرة العادية



    البشرة العادية ناعمة الملمس، خالية من الحبوب والدهون والبقع، صافية ملساء رقيقة، وهي أفضل أنواع البشرات، لأنها بشرة متوازنة.


    البشرة الدهنية


    دي بقى بتبقى لامعة وبتتميز بمسامها الواسعة اللي بتفرز دهون كتير، خاصة على الأنف وعند الدقن، ده بالإضافة للبثور الصغيرة اللي بتحتوي على رءوس بيضا وسودا كمان




    البشرة الجافة


    البشرة الجافة بتكون خشنة ومشدودة والمسام بتاعتها بتبقى ضيقة جدا وبيبان عليها خطوط الجفاف وتظهر في بعض الأحيان قشور بيضا بسبب الجفاف وده لأنها خالية من الدهون



    البشرة المختلطة


    جافة ودهنية في آن واحد، جافة عند الخدين ودهنية عند الجبهة والدقن وجانبي الأنف، والنوع ده من أكتر أنواع البشرة انتشارا.


    البشرة الحساسة

    ودي بتكون فيها عروق حمراء، وبتظهر على أنها بشرة صافية لكنها أكتر نوع من أنواع البشرة بيتأثر بالعوامل الخارجية. وتقلبات الجو يعني فجأة تلاقيها فيها حبوب واحمرار ومرة صافية وجميلة ونضرة



    ودلوقتي بعد ما عرفنا الأنواع بصورة عامة هنقدم لك طريقة سهلة لمعرفة نوع بشرتك.

    اختبار البشرة

    فيه مجموعة من الاختبارات لمعرفة نوع البشرة وانا اخترلك منهم اختبارين مهمين. ما عليكِ إنتِ غير إنك تعملي الأنسب لك منهم....
    اختبار المناديل



    اغسلي وشك ونشفيه كويس وسيبيه لمدة ساعة وبعدين حطي عليه مناديل ورق واضغطيها على وشك وراقبي اللي هيحصل، المناطق اللي هتلزق عليها المناديل وتلاقي عليها دهون وكمان تلاقي المنديل بقى شفاف؛ هي دي المناطق الدهنية من البشرة. لو مابتشربش أي دهون فده معناه إن بشرتك جافة. ولو لزق بمنطقة الجبين والأنف والدقن فبشرتك تبقى من النوع المختلط.



    اختبار بودرة التلك

    زي الاختبار الأولاني تقريبا بس هو أسرع شوية في الوقت. اللي عليكِ إنك تغسلي وشك كويس وتنشفيه كويس جدا جدا وبعدين تجيبي بودرة تلك وتحطيها على وشك وتسيبيها 1/4 ساعة وبعدين تقفي قدام مروحة هتلاقي مناطق فضل عليها بودرة التلك هي دي المناطق الدهنية من البشرة. ولو مافضلش حاجة من البودرة على وشك فده معناه إن بشرتك جافة. ولو فضلت بس بمنطقة الجبين والأنف والدقن فبشرتك تبقى من النوع المختلط.

    مزايا وعيوب كل بشرة

    لازم تعرفي إن لكل بشرة مزاياها وعيوبها ومفيش بشرة وحشة على طول ولازم تنتبهي برضه إن مافيش بشرة حلوة على طول يعني ممكن الدهنية بشوية اعتناء تتحول لمختلطة والعادية بإهمالك ليها تتحول لبشرة دهنية.


    البشرة الدهنية

    يعني مثلا البشرة الدهنية مش محتاجة خالص لأي مرطبات لأنها أصلا بتعاني من زيادة إفراز الدهون، يدوبك بتحتاج لتو*** قابض للبشرة وممكن يتحضر من الحاجات الطبيعية.


    البشرة الجافة

    البشرة الجافة بتبقى عادة بشرة صافية لأنها مابتخزنش أي نوع من أنواع الدهون لكن مشكلتها في القشف والجفاف.


    البشرة العادية

    الحقيقة هي بشرة مثالية لكن المشكلة إن لو أهملتيها بسهولة ممكن تتحول لجافة أو دهنية.


    البشرة الحساسة

    للأسف هي عيوبها كتير يعني الاحمرار والحبوب وكده لكن برضه الميزة فيها إنها ممكن تتحسن وتبقى عادية مع الاعتناء الجيد بيها

    البشرة المختلطة

    ميزتها إنها بسهولة ممكن تتحول للبشرة العادية، وده في نفس الوقت عيبها لأنها ممكن بنفس السهولة تتحول للبشرة الدهنية


    نصائح عامة للبشرة



    ابعدي خالص عن التدخين والأماكن اللي بيتواجد فيها المدخنين.


    ابعدي عن التعرض المباشر لأشعة الشمس خاصة في الفترة من 11-3 ظهرا.



    لازم تستخدمي المستحضرات المناسبة لنوع بشرتك سواء كريمات أو ماكياج أو أي حاجة تانية حتى المناديل المخصصة للبشرة
    avatar
    صمتي حكاية
    مؤسسة المنتدى
    مؤسسة المنتدى

    عدد المساهمات : 66
    تاريخ التسجيل : 16/11/2009

    رد: ملف لكل ما يخص البشرة

    مُساهمة من طرف صمتي حكاية في الجمعة ديسمبر 11, 2009 2:57 am

    ازاي تحطي الماسك

    قبل ما نتكلم عن الماسكات عايزة أقول لك على كام حاجة كده مهمة قوي تخلي بالك منها وإنتِ بتحطي الماسك، وده بيساعد إن الماسك ينجح ويجيب تأثيره إن شاء الله..
    والحاجات دي مش صعبة خالص بس إنتِ خلي بالك منها..
    وهي:

    1. وإنتِ بتحطي الماسك مش محتاجة حد يقول لك إنك تحطي المسك على وجهك مع تجنب المنطقة اللي حول العينين والفم، وطبعا اوعي تنسي تحطيه على الرقبة من الأمام والخلف.


    2- كمان اوعي تنسي إنك تنضفي بشرتك كويس قبل وضع الماسك، وده بيكون بإنك تغسلي وشك بالماء والصابون، بس خلّي بالك إن الصابون ده يكون بيناسب نوع بشرتك.



    3- فيه حاجة حلوة كمان ممكن تعمليها، وهي إنك تبلي فوطة بماء ساخن وتحطيها على وجهك شوية لمدة 5 دقائق قبل ما تحطي الماسك.

    ودي فايدتها إنها بتخلي مسام البشرة متفتحة وبالتالي تكون البشرة قادرة على إنها تتقبل الماسك اللي إنت هتعمليه بسهولة.

    بس كده تعالي بقى نشوف المجموعة دي من الماسكات اللي مقسمة على حسب نوع بشرتك.

    ماسكات للبشرة الدهنية

    وطبعا زي ما إنت عارفة إن البشرة الدهنية محتاجة عناية خاصة وده لإنها بتتميز بحساسيتها الشديدة..

    علشان كده بنلاقي إن أنسب أنواع الماسكات اللي تنسابها هي الماسكات دي.


    ماسك الطماطم



    وطبعا مفيش بيت مافيهوش طماطم، وهتسأليني وتقولي ليه الطماطم بالذات؟ هاقول ليك علشان الطماطم بتتميز بمفعولها القابض للبشرة. وبكده يمكن الاعتماد عليها في تضييق مسام الوجه.


    المكونات:
    ثمره طماطم.
    قشر نصف ليمونة.
    عصير ليمون.

    الطريقة :
    اهرسي ثمرة الطماطم وضيفي إليها بشر قشر الليمون وعصير الليمون.
    وبعد كده حطي الماسك على وشك لمدة ربع ساعة، ثم اشطفي وشك بعد كده بالماء الفاتر.



    ماسك الردة



    المكونات:
    ردة.
    ماء ورد.

    الطريقة:
    ضيفي ماء الورد إلى الردة لغاية لما تلاقيها أصبحت على شكل عجينة لينة.. حطيها على وشك ورقبتك لمدة ربع ساعة.

    بعد مرور ربع ساعة افركي هذا الخليط من على وشك بس خلّي بالك إن عملية الفرك دي تكون بلطف.

    وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها.

    ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.. أكيد لما تجربيه هتشعري بده.



    ماسك شرائح الخيار

    وده بيعتبر من أسهل أنواع الماسكات وهو عبارة عن إنك تقطعي شرائح الخيار وتغطي بيها وجهك لمدة ربع ساعة، وبعد كده شيليها واغسلي وجهك بالماء الدافئ اللي مضاف إليه ماء الورد وهتشوفي النتيجة بنفسك.




    ماسك الخميرة



    المكونات:
    خميرة بيرة (هتجيبيها من عند أي فرن أو حلواني).
    ماء ورد.


    الطريقة:
    اخلطي الخميرة البيرة مع ماء الورد، بس خلّي بالك إنك تحصلي على قوام غليظ يشبه العجينة، وادهني بيها وشك ورقبتك على الأقل لمدة ربع ساعة.

    وبعد كده اشطفي وشك بالماء الدافئ كذا مرة لغاية ما تتأكدي إنه مافيش أي أثر للخميرة على وشك..


    بس كده دي كانت مجموعة من الماسكات اللي تناسب البشرة الدهنية، جربيها واكتبى لى النتيجة.




    ماسكات للبشرة الجافة

    دي بقى مجموعة من الماسكات اللي تناسب البشرة الجافة، وإنتِ اختاري منها اللي متوافر ليكِ.

    ماسك زيت الزيتون بالبيض



    المكونات:
    صفار بيضة.
    ملعقتان زيت زيتون.
    ملعقة دقيق.
    ملعقتان لبن طازج.

    الطريقة:
    اخلطي المكونات دي كلها مع بعضها، وبعد كده حطيها على وشك وسيبيها لمدة ربع ساعة، وبعد كده اغسلي وشك بالماء الدافئ كذا مرة وهتشوفي النتيجة.


    ماسك عسل النحل بالخميرة



    المكونات:
    ملعقة عسل نحل.
    ملعقة حليب طازج.
    خميرة بيرة.

    الطريقة:
    اخلطي المكونات السابقة مع بعضها البعض، وبعد كده ضعي الخليط على وشك باستخدام فرشاة، وبعد كده سيبيه على وشك لمدة ربع ساعة، ثم اغسلي وشك بالماء الدافئ أكتر من مرة لغاية ما تلاقي إن الماسك مابقاش له أي أثر على وشك.

    وعلى فكرة الماسك ده غير إنه بيفيد البشرة قوي، فهو كمان بيمدها بفيتامين "ب"؛ علشان كده بنلاقي إن كل بيوت التجميل بتستخدمه.



    ماسك الكمثرى



    المكونات:
    ربع ثمرة كمثرى.
    بياض بيضة.
    نصف ملعقة عسل.


    الطريقة:
    افرمي الكمثرى جيدا وضيفي إليها خليط من العسل والبيض وامزجي كل المكونات دي مع بعضها وحطيها على وشك لمدة ربع ساعة، ثم اشطفي وشك بالماء الفاتر.



    ماسكات للبشرة العادية

    البشرة العادية دي بقى مريحة خالص لأنها أفضل أنواع البشرة، يعني لا جافة ولا دهنية، بس برضه مايمنعش إنك تدلعي بشرتك شوية وتهتمي بيها، وعلشان كده جبنا لكم شوية ماسكات مخصوص للبشرة العادية..

    ماسك الموز بالطماطم



    المكونات:
    نصف كوب **ادي.
    ثمرة موز.
    ثمرة طماطم.
    عصير نصف ليمونة.

    الطريقة:
    تخلط هذه المكونات مع بعضها، وبعد كده تحطيها على وشك لمدة ربع ساعة، ثم تغسلي وشك بالماء الدافئ وهتشوفي النتيجة.


    ماسك الخيار بعسل النحل



    المكونات:
    خيارة.
    عسل نحل.

    الطريقة:
    اهرسي الخيارة جيدا في الخلاط وحطي عليها ملعقتين من عسل نحل واخلطيهم جيدا مع بعض، ثم حطي الماسك على وشك لمدة ربع ساعة، ثم اغسلي وشك بالماء الدافئ.


    قناع الرده بالبيض



    المكونات:
    بيضة.
    نصف ملعقة صغيرة عصير ليمون.
    ملعقتان كبيرتان من الدقيق.

    الطريقة:
    اخلطي المكونات كلها مع بعضها لغاية ما تبقى على شكل عجينة، وبعد كده حطيها على وشك لمدة ربع ساعة وبعد كده اغسلي وشك بالماء الدافئ.


    ماسك ال**ادي والبيض



    المكونات:
    بياض بيضة واحدة.
    4 ملاعق كبيرة **ادي.

    الطريقة:
    اخلطي بياض البيضة مع ال**ادي، وبعدين اتركيه على وشك لمدة ربع ساعة، ثم اغسلي وشك بماء دافئ.

    ممكن بعد كده إنك تمشِّي قطعة مبللة من المية الباردة على وشك، وعلى فكرة الماسك ده بيغذى البشرة قوي.





    ماسكات للبشرة الحساسة

    من اسمها كده يبقى بتتميز بحساسيتها الشديدة علشان كده نلاقي إن أنسب أنواع الماسكات اللي بتناسبها هي الماسكات دي، بس خلي بالك إن مدة الماسك على بشرتك لا تزيد عن عشر دقائق فقط، لأن البشرة دي مش محتاجة أكتر من كده، وكمان مش بتستحمل أكتر من كده.


    ماسك الدقيق



    المكونات:
    ملعقة كبيرة من الدقيق.
    4 ملاعق كبيرة من ماء الورد.

    الطريقة:
    يتم خلط المكونات السابقة مع بعضها لغاية ما يكون على شكل عجينة لينة جدا توضع على الوجه والرقبة لمدة 10 دقائق، ثم تزال بقطعة قطن مبللة بماء الورد، ثم يغسل الوجه بالماء الفاتر.


    ماسك عسل النحل الخالص



    المكونات:
    5 ملاعق كبيرة من عسل النحل.

    الطريقة:
    مفيش أسهل من دي طريقة، وهي إنك تدهني وشك بالعسل النحل وتسيبيه على وشك لمدة 10 دقائق، وبعد كده تدلكي وجهك بأطراف أصابعك المبللة بعسل النحل، وتستمري في التدليك لمدة 3 دقائق، ويا سلام بقى على الانتعاش اللي هتحصلي عليه وإنت بتمرري قطعة من القطن مبللة بماء الورد. وبعد كده تغسلي وشك بالماء الفاتر.


    ماسك الجليسرين



    المكونات:
    2 ثمرة خيار.
    جلسرين.
    ملعقة دقيق كبيرة.

    الطريقة:
    اضربي الخيار في الخلاط، وبعد ما تضربيه ضيفي إليه كمية من الجلسرين مساوية لكمية عصير الخيار اللي عندك، وضيفي إليه ملعقة الدقيق.
    بعد ما تجهزي الخليط ويكون بقى على شكل عجينة لينة حطيه على وشك وسيبيه لمدة 10 دقائق.
    بعد مرور 10دقائق مرري قطعة مبللة بماء الورد على وشك وبعد كده اغسلي وشك بالماء الفاتر، وهتشوفي النتيجة.



    ماسكات للبشرة المختلطة

    البشرة المختلطة بتجمع بين البشرة الجافة والدهنية وعلشان كده فأنسب أنواع الماسكات للبشرة هي دي..
    ماسك الجزر



    المكونات:
    ½ جزرة متوسطة الحجم.
    ¼ ملعقة عسل نحل.

    الطريقة:
    قطعي نصف الجزرة شرائح واعصريها وصفيها، وبعد ما تحصلي على هذا العصير ضيفي إليه العسل واخلطي هذا الخليط، وادهني بيه وشك لمدة ربع ساعة، وبعد كده اغسلي وشك بالماء الدافئ.

    والماسك ده مش بيرطب البشرة وبس، لا ده كمان بيغذي البشرة بفيتامين أ.


    ماسك الورد



    المكونات:
    ورد ناشف.
    عسل نحل.

    الطريقة:
    اطحني الورد واخلطيه بالعسل وحطيه على وشك ورقبتك لمدة نصف ساعة

      الوقت/التاريخ الآن هو الجمعة أكتوبر 20, 2017 6:24 pm